ရန်ကုန်မြို့က ဗလီတွေကို ဖေါက်ခွဲရေး လုပ်ဖို့ ကြိုးစားတယ်လို့ ရဲတပ်ဖွဲ့က စွပ်စွဲပြီး ရခိုင်လူငယ် ၃ ဦးကို ဖောက်ခွဲမှုနဲ့ ထောင် ၄ နှစ်စီ ချမှတ် ။
ရန်ကုန်မြို့က ဗလီတွေကို ဖေါက်ခွဲရေး လုပ်ဖို့ ကြိုးစားတယ်လို့ ရဲတပ်ဖွဲ့က စွပ်စွဲပြီး ရခိုင်လူငယ် ၃ ယောက်ကို ဒီနေ့ ထောင်ဒဏ် ၄ နှစ်စီ ချမှတ်လိုက်ပါတယ်။
ကိုခိုင်နေမင်း၊ ကိုဘိုဘိုထွန်း၊ ကိုသိန်းညွန့် တို့ကို ရန်ကုန်တိုင်း မြောက်ပိုင်းခရိုင် တရားရုံးကနေ စီရင်ချက် ချလိုက်တာလို့  သူတို့အမှုကို လိုက်ပြီး ဆောင်ရွက်ပေးတဲ့ ရှေ့နေ ဦးရောဘတ်စန်းအောင်က RFA ကိုပြောပါတယ်။
"အဲဒီ့ ရခိုင်လူငယ် ၃ ယောက်ကို ရဲမှူးကနေပြီးတော့ ရန်ကုန်မြို့မှာရှိတဲ့ ဗလီတွေကို ဗုံးခွဲဖို့ကြံစည်ပါတယ်၊ နယ်စပ်မှာ သင်တန်းတက်ပါတယ် ဆိုပြီးတော့ ညှင်းပမ်း နှိပ်စက်ပြီးတော့မှ ဒီဟာကို အမှု တည်ဆောက် လာတယ်၊ အမှုတည်ဆောက်လာ ပြီးတော့ ၁၉၀၈ ခုနှစ် ပေါက်ကွဲ စေတတ်သော ဥပဒေပုဒ်မ ၅/၆ နဲ့ တရားစွဲဆိုတယ်၊ စွဲတဲ့အခါမှာ သက်သေခံချက်က မခိုင်လုံပါဘူး၊ သက်သေခံချက်တွေ မခိုင်လုံသော်လည်း တိုင်းဒေသကြီးရဲတပ်ဖွဲ့က စွဲတယ်ဆိုတဲ့အပေါ်မှာ မူတည်ပြီးတော့ နောက်ဆုံးသက်ရောက်မှုကတော့ ထောင်ဒဏ်လေးနှစ် ဒီနေ့ အမိန့်ချလိုက်တာပေါ့"
ကိုခိုင်နေမင်းဟာ အရင်က မကြာခဏဆန္ဒပြခဲ့တဲ့အတွက် ပုဒ်မ ၁၈ နဲ့ အရေးယူခံရဖူးပြီး၊ ၂၀၁၃ ခုနှစ် နိုဝင်ဘာလမှာတော့ နယ်စပ်မှာဖေါက်ခွဲရေး သင်တန်းတက်ခဲ့တယ်ဆိုတဲ့ စွပ်စွဲချက်နဲ့  ဖမ်းဆီးခံလိုက်ရတာလို့ ပြောပါတယ်။
သူတို့အမှုအတွက် သက်သေပစ္စည်းတွေကလဲ ကလေးကစားစရာယမ်းပြား အပြား ၄၀ ၊ မီးခြစ်တစ်လုံး၊ တယ်လီဖုန်းတစ်လုံး၊ ဝိုင်ယာကြိုးအတိုတချောင်း၊ ပီဘီစီပိုက်နဲ့ မီးသွေးတွေပဲဖြစ်တယ်လို့ ဆိုပါတယ်။ ဒါကြောင့် သူတို့မှာ အပြစ်မရှိတဲ့အပြင် အမှုတည်ဆောက်တာရော သက်သေခံချက်ပါ မပြည့်စုံတဲ့အတွက် ဒီစီရင်ချက်အတွက် အယူခံဆက်တင်မယ်လို့ ရှေ့နေကပြောပါတယ်။
No comments:
Post a Comment